【世界台】中國佇印度洋設債務陷坑

中國借錢予較散ê國家，利用債權來控制債務國，包括取得港口來做軍事用途，這幾年佇印度洋動作特別大，對地緣政治ê影響，引起tsē-tsē國家緊張。

佇印度西南方ê小群島國Maldives，這陣有機場、大橋、港口等等幾若个大建案teh進行，主要攏是共中國ê官方銀行借錢，koh由中國ê工程公司承造。根據國際貨幣基金(IMF)估計，經濟主要靠觀光業ê這个小國，今年ê債務可能會超過GDP ê 100%。

Maldives政府三年前命令一个小島Gaadhoo頂頭ê居民總徙走。媒體引述政治界ê風聲講，總統Abdulla Yameen已經暗中答應欲共這个島交予中國，中國準備欲佇tsia建立軍事基地。

類似ê情形已經發生佇其他所在。Sri Lanka ê前總統共中國貸款，建設南部ê Hambantota港，伊佇三年前落選落台，一部份原因就是傷親中。毋過Hambantota計畫留落來ê欠數傷大條，商業效果koh無好，經過紛擾ê抗議佮協商，現任政府共這个港口租予中國來拄數，租約99年，舊年底已經正式移交。

Hambantota至少有約束袂當做軍事用途。仝一年，中國佇東非ê Djibouti成立伊ê第一个海外軍事基地；另外，Pakistan ê Gwadar港租予中國40年，雖然講限定非軍事，毋過中國已經計畫佇附近koh成立一个海軍基地。

美國智庫「全球發展中心(Center for Global Development)」頂禮拜發佈一份報告，講佇中國ê「一帶一路」計畫衝擊之下，有八个國家tshu入債務苦境ê風險特別懸。頂頭講著ê Maldives、Djibouti佮Pakistan攏在內。

印度戰略學者Brahma Chellaney講，中國用「債務陷坑」ê步數，來共小國ê自主性束縛，迫in聽話，共in納入中國ê戰略軌道。有ê手段，像長期租約，就和往過歐洲殖民強權用來對付中國ê仝款。

Chellaney講，中國共勢力愈來愈伸向印度洋，尤其是印度四箍輾轉ê國家，就是刁工欲共印度包圍。

這个區域目前ê主要強權猶是美國佮印度，這兩國加上日本、澳洲，tng-teh計畫聯合來對抗中國佇印度洋和太平洋ê擴張。除了tsia-ê大國ê警戒，《經濟學人》雜誌講，佇予中國插手ê小國，屈辱ê債務重整和貪腐ê風聲，mā加深國內衝突，一帶一路帶來這个區域ê，毋是發展和穩定，suah是敵對。

【世界台】Facebook專頁