【世界台】化武殺人未遂事件 英露關係緊張

露西亞官方涉嫌佇英國用化學武器暗殺一个反背ê前情報人員佮in查某囝，兩人性命危險。事件造成兩國關係惡化，互相驅趕外交官。佇禮拜ê選舉大贏當選第四任期ê露西亞總統 Vladimir Putin，tng-teh考驗英國ê氣魄佮西方陣營ê團結。

66歲ê Sergei Skripal 原底是蘇聯佮露西亞ê情報人員，1990年代予英國吸收，後來予露西亞掠著，坐監幾若冬，koh佇一擺情報犯交換放出來，徙去英國定居。

英國首相 Theresa May 頂禮拜一佇國會講，事件kan-na有兩種可能，無就是露西亞政府針對英國ê直接行動，無就是露西亞共有災難危險ê毒劑管制無好勢，予別人提去。伊講，「咱袂當容允這種佇咱ê國土頂頭謀殺無辜平民ê無恥行為」。

露西亞無照伊ê要求佇第二工內解說，May 佇拜三宣佈共23个予英國認定是特務ê露西亞外交官趕出境，是冷戰結束以來上大規模。

英國得著美國、法國和德國支持，四國ê領袖隔轉工發佈聯合聲明，講這个放毒行為是對英國主權ê攻擊，任何國家án-ne做是違反化學武器公約和國際法。

美國並且佇仝一日宣佈新一波對露西亞ê制裁，是針對後者佇2016年美國總統大選期間利用網路進行ê干擾。雖然這項作業已經進行真久，拄好佇這工宣佈， mā表現出共英國伨ê意思。

露西亞前科規捾，Putin 總統ê反對者佇英國予人暗殺抑是死因可疑ê案件，已經有十幾件。這遍英國ê媒體言論大部份贊成對露西亞踏硬。《金融時報》副總編輯 Philip Stephens 寫講，早就愛共露西亞駐英國大使館內底ê特務總戽出去，英國袂當軟汫，有實在koh會延續ê威嚇手段，才袂予露西亞食夠夠。

毋過在野ê工黨ê領袖 Jeremy Corbyn 主張避免和露西亞衝突，警告變做「新冷戰」，認為愛有證據才通共露西亞指控。伊較保守ê態度引起真tsē黨內ê國會議員反彈。

民調mā顯示民意徛佇May這爿，56% ê受訪者支持伊趕露西亞外交官ê決定。問著佗一位是處理這件代誌上好ê領導者，39% 講是 May，kan-na 16%佮意Corbyn。

【世界台】Facebook專頁