【世界台】Kashmir佮南亞水戰爭ê危機

以下這篇短文，是用教育部公布的台語標準用字寫成。一點都不難，認得中文、略通台語，就懂八九成了。還有聲音檔唸給你聽，許多字詞也超連結到教育部《臺灣閩南語常用詞辭典》。看世界新聞，兼學台語文，就是【世界台 ~ Sè-kài Tâi】啦！

印度佮Pakistan佇Kashmir衝突升懸，最近半個月ê 軍事行動已經造成至少20个人死亡。佇各種設想ê戰爭危機內底，有一層，是水ê戰爭，有分析家講，若準發生，恐驚是毀滅性ê。

印巴兩國佇Kashmir有領土糾紛，兩國實際上以一條「控制線」為界 。9月18暗時，一陣武裝份子uì巴國彼爿軁過控制線去偷襲印度ê兵營，刣死18个軍人。印度也彈死四个來犯者，講in是恐怖組織ê成員，並且指控Pakistan支持遮的組織。29號，印度報仇，宣稱對巴國Kashmir境內的恐怖組織發動「外科手術式」ê攻擊成功 。這聲換Pakistan抗議，講in有兩个軍人犧牲。

自今年7月，印度ê Kashmir爆發親Pakistan ê示威，印度鎮壓刣死80外人，這个敏感ê地區又koh動亂起來。佇最近一波ê兩國相嚷當中，印度ê官員唱聲欲廢除「印度河水協定」。

這个協定，是1951年印巴兩國經過世界銀行協調簽ê，同意共同管理印度河盆地ê水源。印度河主流流貫Pakistan，是這个焦燥ê國家上主要ê水源，毋過這條河佮支流ê上游來自印度佮印度彼爿ê Kashmir。

Pakistan隨回應講，印度若剺破這个協定，就是一項「戰爭行為」。在Pakistan看來，這代表印度準備欲佇水頭起水壩，共伊ê性命線捏咧，這是足嚴重ê代誌。

美國ê南亞政治專家Michael Kugelman講，印度若án-ne做，會造成「人道大災難」。因為Pakistan是全世界水源壓力上大ê國家之一：伊ê每人平均可用水量拄好佇欠水ê邊緣；伊ê經濟上主要是靠用水真傷ê農業；地下水ê存量mā真危險。

Kugelman研判印度mā可能毋敢án-ne做，主要是會受著國際譴責佮反制。另外，這會起一个危險ê例，予Pakistan ê盟友中國，mā有借口共雅魯藏布江的水閘起來， 損蕩下游ê印度東北部。相關工程早就咧進行，印度mā一直足煩惱。

話那咧講爾，也毋知敢有關連，9月30，中國就宣佈已經共雅魯藏布江ê一條支流閘起來，準備提早起水壩。《印度時報》講，中國無定著只是咧共印度嚇驚，但是既然印度有這个弱點，印度政府這時煞提起印度河水協定，予真濟專家誠意外。

【世界台】Facebook專頁