【世界台】美國佇Yemen ê戰爭角色

Syria以外，中東有另外一个國家，這站也是不時天頂落炸彈，炸死平民，但是koh較罕得受著國際關注，彼就是Yemen。佇遐，Saudi Arabia做頭ê聯軍被指控犯戰爭罪。美國對Saudi提供軍事支援，責任mā受著質疑。

這個月初八，Yemen ê首都Sana'a發生驚動世界ê慘案：阿拉伯聯軍ê軍機共炸彈掔佇一个喪禮會場， 炸死140外个人，傷者有600外。

Yemen散赤koh長年內戰。2014年，Shia派ê Houthis叛軍攻佔首都，伊ê後壁有Iran咧相伨。支持原政府ê Sunni派強權Saudi招幾若个鄰國組聯軍，舊年3月開始轟炸叛軍控制ê地區。這遍in攻擊ê喪禮，就是叛軍政府ê內政部長為伊ê老爸辦ê，所以有袂少官員出席，毋過平民mā真濟。

非政府組織人權觀察發聲明講，這種刁工抑是至少毋避免攻擊平民ê行動，真明顯已經構成戰爭罪。進前Saudi就直直轟炸學校、市場、病院、婚禮等等ê平民目標。19個月以來，Yemen佇戰火中死亡ê平民，照聯合國統計，已經有4000捅。

Saudi是美國佇中東重要ê盟友，美國賣真濟武器予伊，mā佇這場戰事內底提供目標ê資訊佮替戰機加油。這擺ê喪禮慘案了後，美國隨表示不滿，講欲繼續減少對Saudi ê支持，並且呼籲各方停火。

Reuters通訊社頂禮拜報導講，美國政府內部進前就有辯論，有官員真煩惱美國會因為Saudi傷過份ê行為，牽連著戰爭罪。

毋過無幾工仔，美國ê軍艦就射飛彈共Houthis ê三个雷達基地炸掉，講是自衛，因為對方先發動無成功ê飛彈攻擊。這是這場衝突內底，美國第一擺直接出手攻擊。

美國作家Moustafa Bayoumi講，美國總統大選當鬧熱，選民煞無注意著國家可能koh會絞入去一場殘害平民koh歹收煞ê戰爭。伊呼籲兩大黨ê候選人愛共對Yemen ê政策講清楚。


【世界台】Facebook專頁