【世界台】英國May首相ê新路線引排外爭議

脫歐公投之後接任英國首相ê Theresa May頂禮拜佇保守黨大會致辭，宣示一个伊稱做「新tiong-ng」ê立場。這條路線被形容是「經濟倒斡、社會正斡」，其中排外ê成份予人批判kah真厲害。

May佇演說內底講脫歐公投是一場「恬靜革命」，伊認為公投ê結果表示民意毋但欲改變英國佮歐盟ê關係，mā要求改變國內ê治理。伊再度強調伊初就任ê時講ê，國家愛追求平等，服務勞工大眾，毋是偏向好額人。

May講，愛「拒絕社會主義左派佮自由主義右派提供ê意識型態版型」，政府愛行出來，佇經濟、社會各方面積極解決問題。伊這種介入ê思維，佮傳統ê保守黨真無仝。

伊那提倡社會一體ê精神，那講，低技術ê移民入來，煞予本國人失業抑是領低薪，無公平。伊koh指責都市ê智識人看袂起一般民眾ê愛國心佮對犯罪、移民問題ê憂慮。

《經濟學人》週刊批評講，May ê路線是全面放棄英國幾十年來ê治理方式；英國一向ê優勢是開放、有伸勼、以都市為主ê服務經濟，和高度流動佮國際化ê人工，新首相這種「保護主義」、「威權主義」、「大眾主義(populism)」ê路線， 予人為這个國家脫歐以後ê前途真煩惱。

偏左ê《觀察者報》禮拜佇社論講，May佮伊ê內閣傷驕傲，叫是家己知影啥物對所有ê人上好，in「當咧利用脫歐做手段，偷偷仔推動引起分裂ê右翼議程」。

文章講，52%贊成對48%反對ê脫歐公投結果，並毋是真一致ê共識，mā毋是授權政府會當凊彩限制企業倩外國員工、限制外國學生來讀大學。保守黨政府ê表態，是「uì英國自由、包容、開放ê傳統退走，勼入去一个小英格蘭ê狹koh虛幻ê世界」。


【世界台】Facebook專頁