【世界台】北韓舞核武 制裁敢有效？

北韓佇頂禮拜四第五改試爆核子彈，是今年以來ê第二改，而且到這个坎站，對區域ê威脅升懸袂少。若是從到今的國際制裁攏無效，koh來欲按怎、會當按怎咧？

報導講，這遍ê試爆，能量參 Hiroshima（広島）原爆差不多，而且北韓用彈道飛彈載核子彈ê能力發展kah真緊，威脅ê範圍愈來愈闊。今年正月彼改ê試爆了後，聯合國安全理事會佇3月通過決議，加重制裁，包括要求各國愛檢查一切進出北韓ê貨物。美國mā升懸伊對北韓機構佮個人ê經濟制裁。

北韓最新ê試爆，證實伊ê領袖Kim Jong-un（金正恩）無咧驚。有分析家指出，任何程度ê制裁，攏無法度阻止北韓發展核武，因為在這个孤立國家看來，這是伊唯一ê生存策略，有核武才會當防止西方勢力kā伊ê 政權偃倒。

有人甚至講，制裁顛倒予Kim Jong-un有愈大ê權力，來控制有可能ê政治對手ê財源，予伊ê統治愈穩定。

聯合國制裁ê效果，真大部份著看中國落實到啥物程度，美國對這並無真信任。兩大黨ê總統候選人這擺攏隨表示愛對中國增加壓力。

今年7月，南韓宣佈和美國合作，部署戰區高空防衛系統（THAAD），中國強烈反對這項計畫。這凡勢mā會進一步影響著中國對制裁北韓ê立場。

美國傳統基金會資深研究員Bruce Klingner講，美國本身ê制裁，mā無執行kah真澈底，一寡中國ê機構佮企業，koh咧做對北韓非法活動有幫贊 ê生理，美國應該愛根據法律kā in制裁，但是Obama政府到今毋捌按呢做。


【世界台】Facebook專頁