【世界台】歡迎難民政策滿一年 無仝款ê德國

一年前，德國決定拍開大門，歡迎來自中東ê難民。一年到tann，入來ê移民超過100萬人， 德國改變in ê人生，家己mā改變真tsē。為著這个政策，總理Angela Merkel ê政黨佇幾工前ê地方選舉，予選民揲kah真忝。

德國《鏡》週刊整理這一年以來ê發展，講初期政府無法度應付大量移民ê狀況，佇後半年已經有明顯ê改善。一方面是入來德國ê人數一個月比一個月減少，這koh有兩个原因，一个是東南歐ê國家kā Balkan半島ê路線封起來矣；一个是歐盟佮Turkey達成ê合作處理難民協議，毋過這个合作關係，佇Turkeyê失敗政變了後，變kah較歹預測。

另外是德國用真tsē氣力來處理移民問題，聯邦移民和難民局（BAMF）ê職員人數，舊年初是2300人，tsit-má 增加到8000人，來消化積kah若山ê申請庇護案，目前猶有超過50萬件猶未決定。官員講，進前複雜ê案件有可能拖 kah超過半冬，tsit-má in ê目標是kā單純ê新案件佇48點鐘以內結束。

蹛ê問題mā穩定咧改善，政府起真tsē住宅予移民蹛，當初kā in收容ê體育館抑是緊急安置所漸漸空出來。報導講，現在正港ê考驗是：德國敢有法度kā遮的大量ê新住民整合入社會。

佇2014佮2015年，就有33 萬个難民兒童佮青少年進入德國學校，構成全體學生ê 2%。為著按呢，全國加倩1萬2000位教師，但是有估計講猶閣欠2萬位。有ê州koh拜託已經退休ê老師轉來教。

就業方面，政府有佮企業合作，來 kā難民安排頭路，毋過tsit-má 做全職工課ê難民kan-na 400外个，另外有2000外人咧實習或者是接受訓練。語言佮教育程度是大問題。毋過因為難民大部份猶少年，政府希望透過教育佮訓練來改善狀況。

但是不滿移民潮ê民意mā咧升懸，9月初4 ê Mecklenburg-Vorpommern州議會選舉是一擺大展示。這是Merkel總理選區所在ê州，伊ê基督教民主黨（CDU）輸kah真歹看，得票率uì五年前ê 23%跋kah賰19%，排第三，佇反移民ê德國另項選擇黨（AfD）後壁。

《鏡》ê這篇報導落尾講，德國社會為著移民問題造成ê分裂，敢會抑是底時會當補起來，猶閣真歹講。


【世界台】Facebook專頁