【世界台】半世紀內戰結束 Colombia新ê未知

一場內戰拍超過半世紀，死22萬人，總算政府佮叛軍簽協議正式停火矣，紲來愛koh公民投票，看全民有同意無。這是Colombia現此時ê狀況。敢有啥物理由拒絕這个和平ê機會咧？上主要，是轉型正義ê問題。

Colombia上大ê左派游擊隊FARC，自1964年開始，以庄跤佮樹林做基地，和政府相戰。雙方koh加上右翼民兵，攏犯下真tsē暴行。FARC並且用賣毒品來窮錢。這是西半球現代上長佮目前為止最後ê一場戰爭，佇這个人口4800萬ê南美國家，受害者除了死傷、予人綁票ê，koh有數百萬人逃難。

現任總統Juan Manuel Santos決定和談，自2012年開始，政府佮實力已經衰弱ê FARC，佇Cuba首都Havana會談。8月24，協議總算簽落去。Santos講， 這日代表「戰爭ê痛苦佮悲劇，欲開始煞尾矣」。

悲劇傷長傷深，新ê局面甚至予人毋知欲按怎看待。43歲ê作家Juan Gabriel Vásquez寫講，伊在內ê幾若代Colombia人，規世人到今，毋捌活過這个國家ê人無咧相刣ê歲月。「久長ê戰爭，kā人性上基本ê概念都腐蝕掉，甚至會予人感覺戰爭ê確定性，包括會當預測ê風險、清楚ê敵人，佮永遠佇別位倒落去ê受害者，比起和平ê無確定，koh較予人會接受。」

照和平協議，舊年就已經實質停火ê FARC，著向聯合國ê人員交出武器。過去ê刣人綁票，若是認罪，就毋免去監獄關，干焦著限制行動佮做社區服務，上長八年；較輕ê罪比論賣毒品，會得著特赦。FARC會使轉型做一个一般ê政黨，參與選舉。

真tsē人袂當接受，認為予FARC傷好過，無正義。前總統Álvaro Uribe tshuā-thâu反對這个協議，伊主張叛軍ê要犯應該愛入櫳仔，而且袂使參政。伊呼籲民眾佇10月初2 ê公投投反對票，要求重協商。

毋過一寡評論認為這無實際，眼前應該是創造今後ê和平較要緊；FARC無可能接受對in傷不利ê條件，若是協議公投無過，in袂投降，戰爭會koh再來。

最近ê民調顯示反對派ê氣勢有起來，兩爿ê支持度差不多，結果猶真歹講。準做到時協議通過，實行也是充滿挑戰：官方佮FARC敢會相互信任？毒品買賣敢會當控制？解散ê游擊隊員，敢會當順序加入社會？政府敢有法度照承諾，改善農村散赤ê問題？而且koh有其他較細ê叛軍準備欲搶FARC留落來ê地盤。

佇國民ê心理上，可能就像Vásquez寫ê，愛接受過去ê真相有毋但一種ê版本，學習這點ê過程，才拄欲開始。


【世界台】Facebook專頁