【世界台】Syria戰火圍城的囡仔明星

《經濟學人》逐期上尾頁ê訃聞版，寫ê通常是活kah七、八十歲以上ê名人，毋過這期ê主角才14歲。這个查埔囡仔Qusai Abtini在世ê時陣，名聲mā無傳遍世界，kan-na佇Syria戰火當中ê圍城，Aleppo。(影片來源：Global News 網站)

Abtini是一齣電視情境喜劇ê男主角，伊佮減伊三歲ê女同學演一對翁仔某，其他ê演員mā仝款是Aleppo城內ê囡仔，假做大人款。這齣戲自兩年前開始，佇控制Aleppo東爿ê叛軍ê電視台播出，搬演隨時受著空襲ê這座城市內底ê生活，予艱苦過日ê居民加減做議量，雖然電有時有、有時無。

照這篇報導描寫，Abtini劇中ê某不管時攏咧埋怨無電、無水、手機仔無訊號、市內ê狀況偌䆀、Assad政府偌歹，佮in ê處境佇世界上無人知。Abtini較涼勢，兩翁仔某定定咧答喙鼓。

為著拍這齣戲，囡仔演員著佇已經炸kah糜糜卯卯ê街仔路走來走去，Abtini劇中ê厝內，雖然佈置kah若像真四序，毋過斟酌看，koh會當看著壁頂有銃子空。真實ê砲聲、炸彈聲mā不時uì附近傳來。

現實中，Abtini除了早就佇學校演出話劇，mā參與反政府ê示威、參加病院ê急救訓練。今年，伊已經大漢kah無適合繼續做一个囡仔演員，伊原本ê角色換一个較細漢ê囡仔接。最近，Aleppo ê情勢愈來愈䆀，Abtini ê老爸決定欲tshuā伊逃出去，7月初8彼工，in坐ê車佇半路予飛彈拍著，Abtini死去。

Syria ê戰爭已經拍五年半，北部ê Aleppo原本是全國第一大城，Assad政府佇露西亞(Russia)ê幫贊之下，用各種攻勢欲kā拍落來。幾個月前，捌暫時停火，毋過7月，戰事koh激烈起來。

頂禮拜，美國CNN記者Clarissa Ward佇聯合國安全理事會發表見證，講伊十幾年採訪tsē-tsē戰地，Iraq、Afghanistan、Gaza等等，毋捌看過像Aleppo遐爾悲慘ê，Aleppo就是地獄。伊講，攻防雙方輸贏來來去去，無一爿會提著最後ê勝利，只是平民繼續受害。


【世界台】Facebook專頁