【世界台】共和黨ê話予民主黨講去

2016.08.01

文／周盈成

圖片：美國民主黨提名Hillary Clinton參選總統。相片來源：Disney | ABC Television Group ，以創用CC 2.0 姓名標示─禁止改作條款授權。

以下這篇短文，是用教育部公布的台語標準用字寫成。一點都不難，認得中文、略通台語，就懂八九成了。還有聲音檔唸給你聽，許多字詞也超連結到教育部《臺灣閩南語常用詞辭典》。看世界新聞，兼學台語文，就是【世界台 ~ Sè-kài Tâi】啦！

美國民主黨頂禮拜舉行全國代表大會，提名Hillary Clinton選總統。真tsē評論講，往過共和黨較在手*ê訴求抑是價值，比論愛國、家庭等等，這擺攏予民主黨搶去矣。連保守派都怨嘆，提名Donald Trump ê共和黨，煞失去原本應該屬於in ê物件。

四工ê大會，一位koh一位ê演講者，kā民主黨爭取美國精神話語權ê功勢發揮kah真澈底。Barack Obama總統引用前總統Ronald Reagan ê名句，講美國是「山頂一座發光ê城市」，對照Trump批評美國是「一个分裂ê犯罪現場」。Obama講Trump想欲靠嚇驚美國人來吸選票，但是美國人自來勇敢、樂觀、慷慨、有才能，團結做伙會當克服困難。

Obama用這款ê話，召喚美國人樂觀佮驕傲ê心理。而且Reagan佇保守派心目中真有地位，莫怪對 Trump原底就不滿ê共和黨人煞感覺佇tsia 揣著認同。一位捌替Reagan寫講稿ê作家甚至佇twitter講，「Obama ê演講，只要提掉五段，就會當成做一篇Reagan ê講詞」。

第一夫人Michelle Obama用家己ê經驗，強調爸母對囡仔ê示範作用，佮總統言行對全國兒童ê影響。這囥入保守派足要緊ê「家庭價值」，嘛無點名就指出Trump毋是適當ê模範。

Hillary Clinton 演說中強調愛國、敬軍。相片來源：Disney | ABC Television Group ，以創用CC 2.0 姓名標示─禁止改作條款授權。

Hillary Clinton本人佇拜四暗ê接受提名演說講，美國「有上強ê軍隊、上創新ê企業家、上久耐**ê價值：自由和平等、正義和機會」。Trump捌剾美國ê軍隊是「一場災難」，Clinton反駁講，美國ê軍隊是國寶，總統應該尊重每一位為國家冒性命危險ê軍人。

仝款佇愛國、敬軍ê主題頂頭，上受著注目ê演說，可能是來自一位佇Iraq戰場犧牲ê Muslim士官ê老爸。伊指控Trump歧視移民，質疑伊敢讀過美國憲法，講伊「毋捌做任何犧牲」。

媒體普遍認為民主黨ê大會成功。有保守派怨慼講，共和黨人今年毋捒一个正港ê共和黨人出來選，論述煞變真空。

猶閣有三個外月才選舉，「啥人較美國」ê話語權之爭，應該猶閣有真tsē好戲通看。

*在手(tsāi-tshuí)：拿手
**久耐(kiú-nāi) ：持久

【世界台】Facebook專頁

【世界台】共和黨ê話 予民主黨講去

【世界台】共和黨ê話予民主黨講去