【世界台】大選了後ê美國 分裂恐驚會繼續

到底是Donald Trump抑是Hillary Clinton會當選美國總統，真緊就會知影。毋過有一種結果，若像已經有真普遍ê共識，就是不管佗一个選牢，美國社會ê分裂會繼續，甚至更加分裂。

紐約時報佮CBS電視網幾工前發佈ê一份民調講，有57% ê受訪者認為Clinton無才調做一个共全國團結起來ê總統，64%對Trump有仝款ê看法。以仝一份民調Clinton佮Trump ê支持率分別是45%佮42%看來，這表示真大部份選民對家己欲選ê人做總統了後ê局面，mā是不止仔悲觀。

若是家己支持ê候選人落選咧？竟然有27% ê Trump支持者講in「可能袂接受官方結果ê合法性」；有11% ê Clinton支持者按呢講。Trump直直宣稱官方會做票，看來已經造成袂細ê影響。

美國政治ê兩極化，佇Barack Obama總統任內成為常態。政治學者講，到tann，兩大黨ê支持者已經真僫為著候選人本身ê特色，迒過黨派ê界線投票。

自由派ê網路媒體Vox ê總編輯Ezra Klein分析，「弱ê黨，強ê黨性」是這陣美國政治危險ê弱點。伊講，尤其是共和黨，黨組織已經無法度主導總統候選人ê初選提名；一旦提名，黨ê菁英佮群眾，不管in原本偌爾無佮意這个人，mā會佇兩極對抗ê結構之下，聚倚來，伨伊到底。

過去，黨ê機制會當防止煽動家出頭，萬一若初選提名較激烈ê候選人，菁英佮群眾mā有可能佇大選ê時共伊放棄。但是這改，Trump規路戰落來，竟然已經差當選kan-na一步。

Klein警告，準做Trump落選，美國人mā應該愛警覺，美國ê民主其實無遐爾健全，美國人其實有可能選出一个威權主義ê煽動家，未來猶是有可能。