【世界台】國際刑事法院可能調查Afghanistan戰爭

國際刑事法院(ICC)凡勢會開始調查發生佇Afghanistan ê戰爭罪行，包括美國人ê犯行。仝這時，一寡非洲國家唱聲欲退出這个國際機構，威脅著後者ê地位佮本來就真有限ê功能。

《外交政策》拜一用「獨家」ê標題報導講，ICC檢察官Fatou Bensouda大概佇年底以前，會發動調查Afghanistan自2003年開始ê狀況。這因為毋是任何會員國抑是聯合國安全理事會移送ê案件，檢察官愛得著三位法官ê同意，才會當開始調查。

報導ê作者David Bosco本身就是研究ICC ê學者，伊講，檢方ê重點會囥佇追訴Taliban等反政府勢力所犯ê罪行，毋過檢方進前也捌一再講著美國人員苦毒人犯ê嫌疑。

ICC是根據1998年ê《羅馬規約》成立ê，tsit-má有124个會員國，美國起頭有簽koh撤回，原因之一就是煩惱伊濟濟ê海外行動會有法律風險。雖然ICC原則上對非會員國ê國民無管轄權，但是若遮ê人佇會員國境內犯罪，ICC猶是有可能透過地ê管轄權共in追訴。

看範勢欲調查世界第一強權行為ê這時，ICC其實拄著真大ê危機。10月21，南非正式通知ICC伊欲退出，講真不滿ICC ê調查攏針對非洲ê領袖。佇南非ê頭前佮後壁，Burundi，佮Bensouda檢察官ê國家Gambia，mā用類似ê理由宣佈退出。Kenya、Uganda佮Namibia也捌唱聲欲退。

遮的國家，大部份是本身ê政權有危害人權ê事件受著調查抑是審查，無就是為著區域ê政治，替盟友掩崁。Sudan ê總統Omar al-Bashir因為佇Darfur ê屠殺，予ICC通緝。伊舊年去南非開會，南非總統Jacob Zuma保護伊自由來去，無照ICC會員國義務共伊掠起來，顛倒批評ICC功能不彰。

牽涉著美國ê Afghanistan狀況調查，敢會影響遮的非洲領袖ê動態？欲講猶傷早。報導講，也無證據顯示Bensouda檢察官ê行動有受著非洲國家出走ê影響。