【世界台】Bangladesh極端主義升高

恐怖份子拜五暗攻擊Bangladesh首都Dhaka ê一間餐廳，殺害20个人質，18个是外國人。佇這个人口1.7億ê南亞國家，極端主義ê暴力這幾年直直升高，毋過政府無好勢應對，代誌發展kah這種地步，未來可能會閣較費氣。

這擺的攻擊發生佇大使館佮外國機構集中、警備嚴密ê地區，Islam國(IS)宣稱是in做ê，而且IS ê媒體代先發佈現場ê相片，這顯示殺手至少參IS有聯絡。落尾軍警拍死六个兇嫌，掠著一个。

過去三年以來，Islam極端份子佇Bangladesh已經暗殺超過40个in眼中ê敵人，手法通常是攑柴刀刜死，受害者包括世俗ê作者、學者、社會運動者、同性戀、異教徒佮無神論者。有ê案件，IS抑是al-Qaeda自稱是in做ê，毋過Bangladesh政府毋承認這兩个國際恐怖組織已經入來活動，這改，伊猶原否認是IS。

報導講，政府進前對遮ê暗殺事件攏無積極咧偵辦，一直到6月初，一位警官ê太太佇家己囡仔ê面頭前予人刣死，政府才開始振動，毋過竟然是發動證據不足ê大逮捕，一禮拜掠超過1萬4000人；其中照警方講才差不多200人佮武裝團體有牽連。

總理Sheikh Hasina指控上大ê反對黨BNP佮遮的攻擊行動有關係；BNP講執政黨Awami聯盟是用這做藉口來掠政敵。這兩个大黨是世俗政黨，但是雙方也攏有近倚ê過激團體，咧鼓吹政教不分ê Islam主義。

政治學者Ali Riaz 5月ê時受訪講 ，Bangladesh ê極端主義升高，原因真濟，毋是單純因為宗教。2014年ê大選發生爭議，紲落來ê政治鬥爭真激烈，主流政黨真捷使用暴力ê語言，社會就按呢愈來愈暴力。伊認為干焦用治安ê手法無法度解決問題，愛進行政治上ê改革。