【世界台】政變後Turkey局勢的國際衝擊

Turkey 7月中一場莫名其妙ê軍事政變，到tann外界對真相猶是霧嗄嗄，總統Recep Tayyip Erdoğan已經快速發動大規模ê政治打揲，加強專制統治。這毋但危害Turkey ê民主佮人權，對國際政治也有真大ê影響，總講對西方不利。

到頂禮拜為止，Turkey已經有6萬人，包括軍人、警察、司法官、學者等等受著直接ê打壓，被監禁、撤職抑是停職。Erdoğan講政變是走去美國ê宗教領袖Fethullah Gülen主導ê，遮的人佮伊有牽連。Turkey政府要求美國引渡Gülen，甚至講美國佇幕後支持政變。這致使這兩个北大西洋公約組織ê盟國關係緊張。

Turkey佮區域政治ê專家Soner Cagaptay禮拜佇英國《衛報》發表評論講，若是雙方ê關係繼續惡化，合作對付Islam國ê行動會歹繼續。美國tsit-má使用Turkey ê空軍基地，去轟炸Islam國。若是合作破局，美國ê軍機就愛徙去地中海ê航空母艦頂抑是波斯灣ê基地。

佇政變進前，Erdoğan就已經開始參露西亞改善關係。舊年11月，Turkey佇佮Syria ê邊界附近拍落一台露西亞ê戰鬥機，雙方冤仇結真重。6月底，Turkey為這件代誌共露西亞會失禮。Erdoğan佮露西亞總統Vladimir Putin預定8月初欲見面，討論兩爿關係ê正常化。

Turkey佮歐洲聯盟今年3月拄達成協議，欲減少進入歐洲ê中東移民佮難民潮。照協議，Turkey愛先安置遮的大部份人，條件是歐盟增加對Turkey ê財務補助，冗早予Turkey國民入歐免簽證，佮加速Turkey加入歐盟ê談判。

毋過tsit-má Erdoğan?踏民主，koh唱聲欲恢復死刑，這聲先死ê大概是入歐盟ê計畫矣。《經濟學人》週刊講，歐洲現此時真為難ê，是欲按怎主張Erdoğan猶原可靠，會當佮伊合作處理移民ê代誌，koh袂使無批判伊衝懸ê威權主義。koh按呢落去，有人煩惱下一波來歐洲走揣庇護ê，無定著是Turkey ê國民。

Cagaptay指出，Erdoğan本底就有迒歐亞發展ê戰略企圖。現在，Turkey ê外交政策徛佇十字路口。若是美國佇Gülen ê代誌頂頭，無予Erdoğan會當接受ê回應，Turkey可能會轉向，去倚露西亞。若是Turkey真正恢復死刑，伊佮歐盟ê難民協議恐驚也不妙矣。


【世界台】Facebook專頁