【世界台】機器人炸彈解決嫌犯 敢有問題？

美國Dallas拜四發生兇手開銃共五个警察彈死的慘案。落尾警方是用遙控的機器人頂頭安炸彈，去共覕佇停車場繼續抵抗的嫌犯炸死。這種手法是美國警方頭一遍使用，引起真濟討論。以後警察的執法，敢會愈來愈成戰爭？

合法性是真濟媒體隨問著的問題。專家普遍認為並無違法，法律教授Eugene Volokh講，若是警方合理相信一个人對其他的人的性命構成馬上的危險，而且只有共伊刣死，才會當防止這項危險，in會當按呢做。毋管是用銃抑是機器人炸彈，in愛遵守的法律程序是仝款的。

另外一位法律教授Ryan Calo講，這改的情形無產生啥物新的法律議題，眾人若感覺礙虐，是因為袂慣勢：逐家接受警方佇正當的情形下會當刣死人，但是上好是用較通常的方式，就是開銃。用機器人加炸彈，參用刀仔抑是用鐵砧仝款，攏會予人感覺不安。

可能不止，因為機器人會予人聯想著伊敢是自動的、敢會佇現場家己做反應。目前並無按呢，毋過猶原有人會想著未來科技發展的可能性。重點是：重要的動作猶是愛由人來做決定，袂當予機器人家己來。

Mā有評論者聯想著美國佇中東用無人飛行機來炸死敵人，質疑佇美國的領土頂頭執法，煞用類似戰爭的手法，執法佮戰爭的界線恐驚會霧去。

毋過用機器人對付嫌犯，邏輯上也無一定會更加暴力，抑是會予執法者愈傾向刣死人。有人就講，若是未來技術閣較進步，機器人會當用非致命的方式壓制嫌犯，抑是予伊昏迷 ，按呢甚至會當避免共伊彈死。


【世界台】Facebook專頁