【世界台】英國脫歐ê地緣政治轉移

英國人決定脫離歐洲聯盟，對世界地緣政治ê影響可能會真深遠。首先是歐盟ê體質會改變，評論者講，這對露西亞總統Vladimir Putin來講，勢面真有利。對美國來講，真䆀。

前美國駐露西亞大使Michael McFaul 寫文章講，英國是歐盟內面，上親美佮上堅定反對露西亞擴張ê會員國之一。英國脫歐，表示以後無這票通影響歐盟ê政策矣。就親像一位露西亞官員知影公投結果了後，真樂暢佇Twitter面頂講ê：「這毋是英國uì歐盟獨立出來，是歐盟uì美國獨立出來。」

軍力佮外交經驗一流ê英國出走，mā會kā歐盟一大部份ê資源、人才佮能力抽走，使歐洲弱化。雖然英國政府會繼續和歐洲合作，毋過佇會員ê會議桌頂佮佇外口，猶是差真濟。歐盟內底，各國對露西亞ê態度也有差別。主張對露西亞較軟ê，今後會較好做代誌；較硬ê，會較費氣。

McFaul講，第一个考驗，就是對露西亞ê制裁，這是兩年前因為露西亞併吞Crimea佮軍事介入Ukraine東部，歐美聯手實施ê。將來，歐盟敢會koh堅持落去？

英國方面，紲落來ê幾若年，攏會用足濟氣力參歐盟協調分手ê條件，佮處理國內ê挑戰，甚至Scotland可能獨立。到時一个實力衰退ê英國，顧家己都袂赴，McFaul感嘆，英美兩國「特殊關係」上好ê日子，大概已經不再矣。

脫歐ê英國猶原是北大西洋公約組織(NATO)ê會員國；準做Scotland有一日分出去，英國佇聯合國安全理事會ê常任理事席次，也袂改變。毋過《衛報》ê分析指出，英國特別ê國際影響力，有真大部份是因為伊同時是歐盟成員。比論Iran核子協議，英國就是透過歐盟機制參與ê。失去歐盟內角色ê英國，佇其他所在ê影響力mā會降低。