【世界台】欲脫離印尼ê西Papua獨立運動

你敢知影東南亞有一个土地面積佮瑞典差不多ê所在，mā有爭取獨立ê運動，而且最近敢若有koh-khah活動起來？彼就是印尼上東爿ê西Papua，頂禮拜三，民眾行上街頭，要求舉辦獨立公投，有千外人予印尼警方掠起來。

西Papua，是世界第二大島New Guinea ê西半爿，以行政區來講，是印尼ê Papua佮西Papua兩个省。遐ê原住民是Papua人，in的種族佮語言，攏佮海洋東南亞ê南島民族無仝。主要ê宗教是基督教，毋是印尼優勢ê Islam。

6月15，數千民眾佇西Papua佮印尼ê幾若个城市示威，訴求包括西Papua加入區域ê政府間組織，佮佇國際監督之下舉辦公民投票，決定是毋是欲獨立建國。媒體報導，佇Papua省ê首都Jayapura，就有超過1000人予警察逮捕、拘留。

流亡蹛佇英國ê西Papua獨立運動領袖Benny Wenda發佈聲明講，佇其他所在嘛有百外人予軍警掠去，最近兩個月以來，已經有差不多3000人因為和平示威被捕。

Wenda講印尼政府是「殘暴ê佔領者、殖民政權」，自1969年併吞西Papua以來，已經刣死50萬人，到tann，當地人猶是無民主佮言論自由。印尼官方否認這種講法。

印尼自1998年開始民主化，最近咧調查進前發生佇西Papua ê濟濟侵害人權事件，毋過獨立運動團體認為這攏是假，要求公正ê國際調查團介入。

西Papua往過佮印尼ê其他部份仝款，受著荷蘭殖民。二次大戰後，以Java島為中心ê印尼獨立了後，荷蘭koh繼續控制西Papua，有準備欲予伊另外獨立。毋過佇印尼ê壓力之下，西Papua經過聯合國機制被交予印尼「暫時管理」，條約規定西Papua ê命運未來愛由住民公投決定。結果佇1969年，印尼揀千外个人做「代表」，強逼in投票贊成統一，就按呢統治到tann。

雖然國際現實對西Papua獨立運動不利，猶是有真濟非政府人士出聲支持西Papua自決，包括南非ê 前大主教Desmond Tutu佮英國工黨領袖Jeremy Corbyn。