【世界台】對啥人的攻擊？Orlando慘案的爭論

美國Orlando ê同性戀夜總會發生50个人死亡ê恐怖攻擊，隨引起一種辯論：這是一場針對同性戀者ê歧視犯罪，抑是對規个社會ê攻擊？為著這點意見無仝，一位英國專欄作家煞佇電視ê現場節目，起呸面做伊走。

32歲ê Owen Jones是英國《衛報》ê專欄作家，伊是男同性戀者，寫ê政治社會評論立場偏左。禮拜暗，伊上Sky電視頻道ê現場新聞評論節目，伊講，Orlando ê屠殺，「是恐怖主義，mā是一件畏同性戀(homophobia)ê歧視犯罪，是西方世界幾若世代以來針對同性戀、雙性戀佮跨性別者(LGBT)上嚴重ê暴行，這點一定愛大聲講出來。」

查埔主持人講，這場攻擊應該是針對人類，針對所有想欲出去耍ê人ê自由，不管in是啥物款人，敢毋是？就親像舊年11月佇Paris ê Bataclan劇院發生ê仝款。Jones氣一下講，「你無了解，因為你毋是gay！」另外一位查某來賓kā伊反駁，講袂當講因為伊是gay，就會使佔有這件罪行引起ê驚惶。

Jones講，若是一个人行入去一間猶太教堂，刣死一大陣猶太人，咱會講這是一場反猶攻擊。Orlando ê殺手刁工揀一間gay club落手，伊ê老爸koh講伊進前捌看著兩个查埔相唚，就受氣，這誠明顯是針對LGBT。Jones問兩位對談者，是按怎欲轉移重點？伊氣怫怫，過一時仔就kā胸前ê mài-kuh掣掉，佇鏡頭前做伊走矣。

仝一工佇《紐約時報》，mā是男同性戀者ê專欄作家Frank Bruni發表ê看法佮Jones無啥仝。伊認為兇手揀這个所在是有意圖ê，毋過伊講，除了對在場ê人，這嘛是對「自由」本身ê攻擊，對多元社會ê攻擊。

目前ê消息講兇嫌佮Islam國可能有意識形態ê牽連，Bruni指出， 極端Islam份子對同性戀者非常殘忍，kā in uì厝頂擲落去；同性戀者佇世界濟濟所在予人刣、予人苦毒；佇美國，同性戀者ê安全保障嘛無夠。

毋過伊講，「這毋是舞身份政治ê時陣」，伊引用Barack Obama總統ê話，呼籲美國人愛團結，對抗偏激ê意識形態。

是按怎，對事件ê本質，有這種爭論？一方面是因為LGBT特別弱勢ê處境。Jones佇隔轉工ê文章內底，再度抗議主流社會對LGBT ê忽視。另外，伊對Islam汙名化ê問題可能也較敏感，伊推測兇手只是用宗教來合理化家己畏同ê心理。Jones並且警告，這件慘案毋通予排外ê人利用去。