【世界台】私刑歹人？菲市長選總統贏面大

菲律賓後禮拜一欲選總統，目前上有贏面ê是南部Davao市ê市長Rodrigo Duterte。國外媒體叫伊「菲律賓ê Trump」，因為伊發言粗魯、挑戰主流政治。其實這種類比真表面，無比著傳聞中伊主要ê政績：用暗殺嫌犯來「維持治安」。

Duterte今年71歲，伊自1988年到 tann，佇Mindanao島ê上大城市Davao已經做七任市長，攏總超過22年。當初Davao是一个真亂、暴力犯罪真嚴重ê所在，佇伊ê整頓之下，tsit-má據稱是亞洲上安全ê城市之一。

這毋但靠警察，koh有一陣地下ê「處決隊」，無法無天，佇街頭共幫派份子、賣毒品ê、佮大大細細各種犯罪ê嫌疑人直接銃殺。報導講，Duterte市長會佇電視頂點名一寡嫌犯，無偌久，遮的人就會被發現死佇街仔路。

當地ê人權團體講，自1998年至2015年，有1400外个人受著這種「法外處決」(extrajudicial killing)，其中百外人未成年。無辜ê有偌濟，無法度知影。

Duterte承認拄上任的時捌親手彈死三个人。其他的，伊有時承認、有時koh否認，講指控伊ê人會當去kā伊告。毋過伊確實不時唱聲，講欲刣死罪犯，講伊若當選總統會koh刣愈濟，kā賣毒品ê擲落去馬尼拉灣飼魚仔。

選民真佮意這味，in認為按呢較贏腐敗koh無效率ê司法體系放歹人逍遙，有民調指出過半ê Davao市民認為處決隊無問題。律師出身ê Duterte嘛毋捌為著任何違法處決受著追訴，這koh反倒轉證明司法體系真正無路用 。

Duterte就是用這種真硬、真雄ê形象，加上講欲為庄跤ê散食人爭權益，uì地方進軍中央，得著熱狂ê支持。

菲律賓佇現任總統Benigno Aquino三世任內經濟大成長，毋過財富主要集中佇城市。而且幾十年來， 中央政治攏是幾个大家族咧控制，真濟民眾感覺ià-siān。Duterte其實嘛是省長ê囝，毋過伊自認毋是馬尼拉彼款ê統治菁英。

Duterte輕視法治佮人權，koh講伊欣賞前獨裁者Ferdinand Marcos，這使人煩惱伊若是當選，敢會koh kā菲律賓tshuā向威權政治。

按呢ê一个政治人物煞自稱是左派。伊佮Mindanao ê Muslim叛軍佮共產黨游擊隊關係攏袂䆀，真會曉佮in談判。遮ê團體表態講伊若當選，當地會較和平。

【世界台】Facebook專頁