【世界台】美國最高法院開放好額人收買政客？

美國最高法院這站咧審理一件州長受生理人招待送禮ê烏西案件，看範勢真可能翻案，並且改寫貪汙ê定義，嚴格限定愛有直接ê利益交換。批評者認為這根本是開放好額人收買公職人員，會予美國政治更加不平等。

Robert McDonnell自2010年至2014年做Virginia州ê州長，佇伊任內，賣健康補充品ê生理人Jonnie Williams送in翁某貴重ê禮物、招待渡假，koh提供12萬美金ê優惠貸款。McDonnell州長就按呢替Williams ê公司主持一場新產品發表會，並且安排伊佮相關官員見面開會。

 

這个案件轟動美國，McDonnell佮in某進前兩審攏被判有罪。毋過伊主張，伊並無採取公務上ê行動，來有利Williams，所以無算貪汙。Williams ê律師嘛講，伊ê當事人付出tsia--ê利益，只是為著欲有管道去佮官員接接，毋是欲影響政府ê決定，所以毋是楔後手。

案件4月27佇最高法院進行辯論，雖然猶未判決，大概愛等kah 6月底，毋過一寡法官ê講法，予外界理解做法院偏向McDonnell ê立場。

最高法院這幾年佇其他案件ê判決，已經認為法律規範選戰時對候選人ê獻金，kan-na會當禁止「公務行為佮獻金直接交換」ê情形。這擺，這个觀念若像延伸到在任ê公職人員。

媒體報導引用一位最高法院法官講，McDonnell若判有罪，會kā「公民佮官員之間正常ê互動」入罪。佇過去ê案件，法官甚至認為「獻金是言論」，受著憲法對言論自由ê保障。

這真違反社會ê常識。逐家攏知，kan-na好額人、有力者毋才有才調用這種方式來佮政治人物交往，這哪是正常互動？敢講法官認為州長提人好處是應該ê？嘛毋是，法官koh講，問題是利益構成犯罪ê標準佇佗位？應該啥人來決定？In認為，無應該是司法部佮檢方，無就違反權力分立。

看來，這種觀點佇最高法院八位法官內底占多數，這引起真tsē人反彈。參選眾議員ê法律教授Zephyr Teachout寫文章批評講，最高法院ê觀點傷過天真，無視歷史、邏輯佮現實。伊指出，美國ê財富遊說政治威脅民主，政治獻金明明就會影響立法佮政策，tsit-má最高法院煞講你提錢予政客ê時，只要無明講交換條件，就毋是烏西，這已經造成憲法危機。