【世界台】露西亞佇Syria蹛落來矣

那拍那談，Syria猶是看袂著和平。露西亞佇3月講「任務完成」，欲撤出主要ê部隊。現此時看來，其實是換一種方式來控制伊佇中東ê這塊地盤，並且毋管停火協議，繼續轟炸對抗Syria政府ê叛軍。

這期《經濟學人》週刊講， 露西亞是減省駐軍，毋捌真正退出，若無，袂輸放棄家己ê影響力，而且kā Syria讓予Bashar al-Assad總統ê另外一个盟友Iran。露西亞撤回一寡軍機，是欲予Assad了解，莫kā 露西亞ê幫贊當做理所當然。

報導引用一位專家講，露西亞宣布撤軍只是調整概念，意思是伊ê駐軍會佇Syria永遠存在，毋是參與一項特定ê任務爾爾。記者參訪露西亞佇Syria北部ê軍事基地，講佇遮，Syria ê軍人佇露西亞人頭前完全是細漢ê，愛聽in指揮。兩爿ê裝備佮紀律嘛差真濟。

5月初5，露西亞世界出名ê Mariinsky劇院交響樂團來到Syria ê古城Palmyra，in表演ê台頂，是舊年Islam國捌處決真濟人ê所在。露西亞用這个場面來向世界宣傳in kā 和平帶來這个城市，另外一方面koh咧轟炸叛軍控制ê大城市Aleppo，造成大量ê平民死傷。

美國佮露西亞兩大強權繼續咧撨Syria ê未來。Assad總統koh想欲恢復統治全國，露西亞總統Vladimir Putin並無支持。Assad想欲kā 叛軍完全掃掉，Putin只是欲kā in拍kah佇談判桌頂聽話。最近Assad ê部隊佇地面ê戰爭真無順序，露西亞ê空中支援也減少。

毋過分析家Marwan Bishara講，Putin欲用戰爭ê成果來換談判ê勝利，擴大伊佇中東ê影響力，猶是真堅定。露西亞已經咧欲kā Aleppo炸了了，予各國了解，若欲終止Syria ê戰爭，一定愛透過伊。只是露西亞嘛愛細膩，若是升高戰事，無愛讓步，凡勢會牢佇Syria，無法度抽退。