【世界台】巴西ê政治經濟危機

巴西國會頂禮拜日對總統Dilma Rousseff啟動彈劾程序，正式ê理由，是伊粉飾財政紅字。佇中南美上大國ê這場政治危機內底，真譀古ê，是指控Rousseff貪汙ê政治陣營，毋但掠無證據，身為往過軍事獨裁ê政治繼承者ê in，本身才上貪腐。

Rousseff佇一年半前經過兩回合ê選舉，當選第二任，tsit-má支持率煞賰個位數，主要ê原因是經濟。受著中國經濟減速ê影響，真倚重原物料出口ê巴西，經濟自2011年就開始轉䆀，偏左ê政府使用刺激方案來救，毋過不敵國際大勢，2014年開始衰退，舊年koh-khah慘，GDP倒勼3.8%。

政府ê財政透支嘛愈來愈嚴重。2014年，Rousseff政府向公營銀行借錢，來kā政府ê數做kah較好看。這種步數佇巴西本底無算重大違法，毋過煞成為反對黨用彈劾欲來搝總統落台ê理由。

朝野ê真濟政客，攏牽涉著uì國營石油公司提錢ê貪腐案件，包括Rousseff ê政治師父、前總統Luiz Inácio Lula da Silva在內。Rousseff本人無涉案，毋過伊佇3月任命Lula做首席部長，被認為是幫助Lula逃避起訴，koh絞出新ê爭議。

4月17，眾議院以超過三分之二ê法定戶橂ê票數，通過Rousseff ê彈劾案，紲落來愛由參議院表決。看範勢，Rousseff真可能會予參議院先停職，審判了後撤職，由無仝黨ê副總統接任。

眾議院彼日ê表決是一齣大戲，500外位議員，排列一个一个行到台前，講一兩句話，公開投落in ê票。真諷刺ê，是真濟家己有弊案在身ê議員，喙喝反貪腐ê口號，投票贊成彈劾Rousseff。根據一項統計，巴西ê國會議員，有六成為著各種ê嚴重犯罪受著司法調查。

巴西ê社會運動者David Miranda寫講，主導反Rousseff運動ê，就是長久以來上好額ê既得利益集團，包括in操控ê媒體，in反對勞工黨政府照顧散食人ê政策。一位後年準備選總統ê右派領袖，彼日投票贊成彈劾Rousseff ê時陣，宣稱伊這票是欲讚揚1964年政變上台ê軍事獨裁政權ê一位軍官，彼个人捌親身刑求當時是反對份子ê Rousseff。

《經濟學人》週刊一向無同情Rousseff ê經濟路線，毋過嘛認為彈劾伊無才調救經濟，因為巴西規个統治階層攏傷腐敗，遐ê欲戽伊走ê人比伊koh-khah漚。除非政治界來一場全面大摒掃，若無，短期猶是看袂著希望。