【世界台】Norway兒福單位強勢 被批評拆散家庭

Norway佇真濟人印象中，是一个社會民主的理想國，毋過較少人知的，是in國家對爸母教養兒童的強力介入。最近，一對翁某據稱是因為體罰，五个囡仔攏予社工tshuā走，幾個月後才送轉來一个，事件引起國際抗議。

抗議者拜六佇20幾个國家連線行上街頭，指控Norway的兒童福利局(Barnevernet)偷掠囡仔、拆散家庭。佇Romania的抗議，規模尤其大，因為這改的事件，囡仔的老爸是Romania的移民，一个電腦專家。

英國廣播公司(BBC)報導代誌的經過：舊年11月的一个下晡，蹛佇Norway偏遠庄跤的R夫婦等無十歲佮八歲的兩个查某囝散學轉來，煞是兒福局的人來挵門，講in已經共兩个囡仔載去緊急安置矣，並且叫R太太去警察局一逝。

兒福局講R夫婦有拍囡仔的嫌疑，in並且隨共厝內五歲、兩歲的兩个查埔囡仔嘛tshuā走，賰一个三個月的屘囝。第二工，兒福局的人閣坐兩台車來矣，R夫婦叫是in總算調查好勢，共囡仔送轉來矣。結果毋是，是嬰仔嘛欲抱走。

Norway的法律禁止體罰，做護士的R太太承認有時仔若囡仔做毋著，in翁仔某會共拍，毋是時常，嘛無拍甲著傷。伊無想著代誌會遮爾嚴重。

五个囡仔被安置佇三个臨時的寄養家庭。爸母干焦去看屘囝，來回的路途就愛八點鐘 。這个嬰仔總算佇4月初予人送轉來矣，較大漢的四个會按怎，閣愛等5月底法院的決定。兒福局講可能會永遠佮in分開。

以上這个案件的內容，攏是這對夫妻講的；兒福局方面依法袂當講出個案細節。毋過這毋是孤立事件。自2008至2013年，予兒福局tshuā離開家庭的囡仔人數，增加差不多50%。上通常的理由竟然只是講爸母「欠缺育飼囡仔的技能」。

Norway的媒體報導，甚至一出世就tshuā走的嘛袂少，2014年就有44人。這個月拄好有一案，是一對雙生姊妹仔出世就予兒福局抱去，理由是in 24歲的阿母有精神病，後來證明這項11年前做的診斷無正確，嬰仔才抱轉來，兒福局嘛無會失禮。

最近，Norway 170位律師、心理學家、社會工作專家連署聲明要求改革，批評兒福局是一个「失能的組織，做出真濟錯誤的判斷」。其中一位律師講，這个制度當初的目的是幫助家庭，毋過兒福局這馬已經發展出一種控制爸母表現的體系，傷過專斷，而且時常先共囡仔tshuā走才做評估，這對囡仔是真大的風險。

兒童佮平等部的一位官員對BBC講兒福局做的基本上無毋著，毋過部內已經欲進行檢討。