【世界台】Mekong河水壩改變環境佮政治

3月中，中國宣佈uì Mekong河水頭的水壩放水，幫助越南的河口三角洲對抗嚴重的洘旱。聽起來若像善事一件，其實，中國佇這條中南半島性命之河的上游直直起水壩，毋但衝擊環境生態佮糧食安定，地緣政治的作用也愈來愈明顯。

 



Mekong河的水頭佇中國境內，叫做瀾滄江。3月22，中國總理李克強佮Myanmar、寮國、泰國、Cambodia、越南這五个中下游國家的領袖手牽手，正式成立「瀾滄江--Mekong河合作」機制（LMC），除了共同管理這條河，閣欲進行多方面的合作。

其實，1995年，寮泰柬越四國就佇國際協助之下，成立Mekong河委員會（MRC），中國佮Myanmar是對話夥伴。現在，新的機制代表中國欲提主導權。中國佇瀾滄江，使用中的水壩已經有六座，計畫中佮當咧起的閣有14座，實際上控制Mekong河主流的水源。

泰國政治學者Thitinan Pongsudhirak分析，中國佇Mekong河上游起水壩佮電廠，做法參佇南中國海造島sio-siāng，攏是單爿擴大政治實力，先做才講。毋過佇南海，周邊的東南亞國家會當聯合美國，參中國對抗；佇Mekong河的水路上，就無法度矣。

中國以下的河段，這馬寮國咧起第一座水壩，主要由泰國投資，將來發的電力嘛欲賣予泰國。Cambodia也有起水壩的計畫。若是目前計畫中的攏算入來，未來規條河會有30座水壩。

這對糧食生產的打擊會真忝。越南南部的Mekong河三角洲，米的產量佔全國的一半，嘛是外銷的大宗。水頭起水壩，毋是干焦影響田水；沉積物予水壩閘牢咧，袂落來，塗就袂肥，而且流失的塗閣無補充。這塊平陽*這馬拄著海水入侵、塗鹽化的嚴重威脅，失去沉積物來擋海水，對種作真不利。

Mekong河嘛是世界產量上大的內陸漁場，魚仔是流域內大量人口主要的營養來源。水壩會阻礙魚仔的洄游佮生湠，有的甚至可能會斷種。

Thitinan講，這馬寮國、泰國佮Cambodia的專制政府攏倚向中國，越南佇南海的議題頂頭佮中國對抗，毋過佇Mekong河的代誌就較細聲。伊講，若中國做了傷過份，無定有一工，遮的中南半島國家會聯合起來對抗中國。毋過伊並無講這可能會按怎來發生。

*平陽：平原