【世界台】歐盟佮Turkey協議處理難民

歐洲聯盟佮Turkey頂禮拜五達成協議，欲用「一个換一个」的方式，處理來自Syria的移民。除了人權爭議，這个計畫敢真正做會到、有降低移民潮的效果，真濟人懷疑。

照協議，歐洲這馬開始，會共非法uì Turkey渡過Aegean海到Greece的移民送轉去Turkey。送轉去偌濟Syria人，就uì Turkey閣接仝數量已經確認難民身份的Syria人，來歐洲定居，頂限是7萬2000人。歐洲按呢做，是欲共移民講「來嘛無效」，阻止in直直來，並且共第一線處理移民的壓力留予Turkey。

交換條件是歐洲增加對Turkey的財務補助，加速Turkey國民入歐免簽證的程序佮加入歐盟的談判，每一項嘛攏加減有困難。

新的移民處理方案佇禮拜隨生效，預定4月初4自Greece送第一批移民轉Turkey。Greece的處理能力，就是一項大考驗。報導講，這馬已經有4萬7000外个移民，予人留佇這个財政困難的國家的收容中心內底，生活條件真䆀，每一工攏閣有數百到千外人uì這條海路來。Greece目前愛等盟國派較濟跤手來支援，才會當開始作業。

協議嘛要求Turkey全力防止偷渡，Reuters通訊社的分析指出，這需要Turkey大規模重部署伊的治安系統，壓制人蛇集團，毋過對Turkey總統Recep Tayyip Erdoğan來講，有閣較要緊的代誌，包括擴張總統的權力佮打擊Kurd族。甚至伊嘛無向望歐盟方面會實現承諾，到時合作若是失敗，凡勢伊會趁機會怪罪歐洲，動員國內民意共伊伨。

而且「一个換一个」的方案實施落去，大部份的歐盟國家著接受超過in目前願意接受的難民人數，佇現此時反移民的氣氛之下，真僫。只是對歐盟來講，這是目前想會著的上好的辦法矣。

一寡人權團體抗議歐盟逃避保護難民的責任。聯合國難民署（UNHCR）講，這个協議看來有符合國際法佮歐盟法，毋過實際的執行猶閣愛克服真濟挑戰。