【世界台】Syria停火協議歹向望

國際強權頂禮拜五佇德國Munich協議Syria暫時停火，毋過自頭就無啥物人真正信篤。現此時Syria政府佇露西亞的幫贊之下，進攻最大城Aleppo，看來咧欲成功，到時恐驚毋但閣是一場人道大災難，對世界地緣政治嘛有大影響。

參加Munich會談的，毋是Syria內部相戰的各方，是支持無仝爿的十幾國，包括美國、露西亞、Iran、Turkey、Saudi Arabia，佮國際組織。會後，美國國務院表示希望停火協議會當佇一禮拜以內實施，予人道援助進入需要的地區，毋過承認無把握各方敢會遵守。

Syria戰爭到3月就滿五年，根據最近的一份報告，已經害死47萬人。這馬的勢面，是有利Syria總統Bashar al-Assad佮佇伊後壁共伊伨的露西亞，in咧欲攻入叛軍控制的北部大城Aleppo，無欲停手。

這幾日，已經有數以萬計的Aleppo居民逃往Turkey邊界。觀察家悲觀預測，等甲政府軍共Aleppo包圍起來，切斷補給，枵餓佮油桶炸彈，就是留佇遐的30萬市民未來的運命，佮進前的幾若个城市仝款。

美國戰略專家Luke Coffey認為，Aleppo若是予Assad拍落來，規个局勢就轉斡矣。Assad若毋是無欲繼續談，就是佇談判桌頂會閣較聳勢。

愈大的得利者，是露西亞總統Vladimir Putin。若成功控制Syria，會當予伊佇Ukraine、Georgia甚至東歐的議題頂頭，面對西方，閣較有喝價的條件。

Coffey指出，美國總統Barack Obama喙講欲Assad落台，實際上無作為。Putin無仝，伊是決心投入一切，佇Syria絕對袂當輸。

露西亞繼續轟炸Aleppo，用的理由是講停火協議無包括針對恐怖份子。毋過恐怖份子是啥人？佇佗位？就在人認定，這就是Syria世界複雜的大亂戰當中的現實。Turkey嘛咧炮擊Aleppo附近的Kurd族部隊，後者對西方來講是對抗Islam國真有效的武裝力量，對Turkey來講是恐怖組織。

正式的和平談判預定2月底佇Geneva來恢復，毋過目前的局勢，真僫得予人樂觀。