【世界台】UN講Assange藏大使館是予人關

「維基解密」(WikiLeaks)創辦人Julian Assange為著走避通緝，佇Ecuador駐英國的大使館，已經三年半。聯合國一个人權小組最近發佈報告，講是英國佮瑞典政府非法共伊拘留。哪會按呢？伊敢毋是家己去覕的？

其實，聯合國「任意拘留問題工作組」頂禮拜公佈的18頁報告，對這並無解說甲真詳細，報告認定Assange受著「剝奪自由」，而且是自2010年底，伊被瑞典的檢察官以涉嫌性侵害來通緝的時就開始，分三个階段，頭先是被單獨拘留佇英國的一間監獄10工、紲落軟禁550工；閣來，伊向Ecuador佇倫敦的大使館要求庇護，自2012年6月覕佇遐到tann。工作組講，這長期延續的剝奪自由，已經違反合理、必要佮合比例的原則。

44歲的Assange是澳洲公民。2010年，維基解密公佈大量的美國軍事佮外交機密，美國真想欲共伊掠。在Assange看來，性侵害案只是藉口，實際上就是欲共伊先引渡去瑞典、閣引渡去美國；佇遐伊會受著迫害。

Assange講，伊蹛佇大使館毋是自願，伊若出來，就會予守佇外口的英國警察掠去。伊主張，若有因素迫使一个人愛佇失去自由佮面臨迫害之間選一个，這就構成「任意拘留」。

工作組佇報告內底無明確討論這个講法，毋過結論猶是全面支持Assange，認為英國佮瑞典政府愛「停止拘留」，放伊自由，而且伊會當向這兩个政府要求賠償。

事實上，五人的工作組，並毋是一致同意。一位澳洲籍的成員因為佮Assange仝國籍，申請迴避。一位Ukraine籍的成員Vladimir Tochilovsky反對。贊成的三位成員，分別來自韓國、Mexico佮Benin。

Tochilovsky提出無仝意見書講，Assange當初是違反保釋，走去Ecuador大使館的，這種為著逃避逮捕的「自我監禁」，並無構成「任意拘留」。工作組無權責來處理這个案件。

英國資深法律記者Joshua Rozenberg嘛投書《衛報》，批評工作組的決定真譀古。伊講，Assange佇英國會當照法律程序拍官司，是伊家己逃保；而且軟禁的時，嘛無影像工作組講的，受著「嚴酷」的對待。也無理由認為，伊若真正被引渡去瑞典，袂受著公平的審判。

工作組講瑞典的檢方辦案無認真，害Assange的監禁來拖長。毋過Rozenberg認為這是Assange本人覕起來，才來造成的。

工作組的意見對英國佮瑞典的司法程序並無拘束力，兩國已經表示袂受影響。