【世界台】菲國總統大選的身世爭論

菲律賓5月初9就欲舉行總統大選，目前資淺的參議員Grace Poe女士民調領先。伊的身世問題煞是熱門爭論點，進前選舉委員會講棄嬰出身的伊無法度證明是天生的國民，袂當參選。最高法院頂禮拜判決承認伊的參選權。

Grace Poe今年47歲，伊拄出世就予人放捒佇一間教堂，後來予電影明星Fernando Poe二世收養。後者佇2004年出來選總統，輸予Gloria Arroyo，並且佇彼年底就中風過身。

伊決定選總統，被對手質疑無證據通證明親生爸母是菲律賓人、伊自出世就是國民，而且講伊選舉前猶未佇國內連續蹛滿十冬，無符合憲法規定的參選資格。選委會12月以遮的理由，撤銷伊的資格。

Poe提出告訴了後，3月初8，最高法院的15位法官，以9比6的比數，推翻選委會的決定，批評選委會濫權。只是針對Poe敢是天生國民的這个實質問題，干焦12位法官投票，贊成佮反對的比數是7比5。Poe的對手按遮揣空縫，講贊成票無過全體法官的半數。

另外，法院嘛接受Poe對2005年中就定居菲律賓的講法。

支持Poe有參選權的法官講，棄嬰推定為天生國民，是符合憲法精神佮國際法的，選委會要求當事者負舉證責任，是侮辱佮歧視，袂輸「佇空喙頂頭抹鹽」。

現任總統Aquino任期內經濟起飛，貪汙嘛有改善，毋過照現行的憲法，總統干焦會當做一任六年，所以伊袂當閣選。Poe目前民調接近的對手有三位，包括現任的副總統，佮執政黨提名的候選人。

《經濟學人》週刊評論講，菲律賓政治的重點四常是候選人的家世佮魅力，毋是政黨佮政策，這擺嘛是仝款。