【世界台】Okinawa徙基地官司 中央地方和解

為著Okinawa（沖縄）的美軍機場徙位的問題，日本中央政府佮反對新基地案的Okinawa縣政府舊年底開始拍官司，頂禮拜五雙方宣佈和解，工程暫停。毋過雙方的實質立場無變，美日安保重要一環的這个問題，未來猶是不明。

報導講，Abe Shinzo（安倍晋三）首相會同意法院的建議，佮Okinawa和解，一方面是避免敗訴的風險，另外考慮著今年熱天有Okinawa縣議會佮國會參議院的選舉，若中央的姿勢傷硬，恐驚對執政的自由民主黨不利。

對Okinawa知事Onaga Takeshi（翁長雄志）來講，會當暫停新地點Henoko（辺野古）的坉海工程，就是一項成果。

日本佮美國佇20年前就同意欲共Okinawa本島南部Futenma（普天間）的美軍機場徙走，後來決定欲徙去北部的Henoko。毋過大部分的Okinawa民意攏要求徙去縣外 。舊年10月，Onaga知事撤消伊的前任核准的 Henoko坉海工程，中央佮地方煞針對程序問題拍官司，雙方攏總提出三件訴案。

這擺和解了後，中央有機會通修正程序，紲落來猶是可能會閣行法院一遍。只是兩爿同意，佇新的判決確定以前，愛繼續協調，並且到時愛遵守判決。

拜五，首相佮知事握手和解，佇這个場面進前，Abe對媒體講「Henoko是唯一的選項」；會後，Onaga講，會堅持無欲予Henoko基地起的信念。

美國國務院嘛表示Henoko計畫無變化，並且希望趕緊佮日本政府討論和解了後的新情勢。

Okinawa的《琉球新報》佇社論批評講，國家一旦決定，地方就干焦會當遵命，「這敢會當講是民主國家？這才是根本的問題」。