【世界台】Merkel行向四連任 德國國際責任僫走閃

德國9月24欲舉行國會大選，一般預測總理Angela Merkel會當輕鬆四連任。世界上較關心ê，是伊繼續領導ê德國，敢會佇國際事務頂頭較積極，並且，和一个非傳統ê美國政府愛維持啥物款ê關係。

美國總統Donald Trump進前批評德國對美國有真大ê貿易順差，軍費koh開傷少，án-ne對美國「真害」。德國媒體資深記者Stefan Theil佇這期《外交事務》雜誌ê文章講，Trump ê聲嗽無kài好，毋過重點大概正確，就是德國uì現在ê全球秩序得著真濟利益，卻對維護這个秩序貢獻無夠。這陣，德國袂當koh閃責任矣。

軍事尤其是重點。露西亞對歐洲安全ê威脅大起來，仝時陣，Trump不滿北大西洋公約組織ê真濟成員國，無照組織設定ê目標，共國防支出提懸到GDP ê 2%。德國目前是1.2%，已經同意會佇2024年達成目標。

因為二戰ê教訓，冷戰時代ê西德真無愛發展軍事，統一了後ê德國，mā到這幾年才慢慢仔改變，tsit-má佇16个國外ê緊張地區有駐軍，毋過大部份ê任務攏毋是直接參與戰鬥。

Theil講，koh-khah大ê問題是：德國並無一套較全面ê戰略，較成拄著一項做一項，而且民意無啥願意對抗露西亞。6月ê一份民調講，25% ê德國人信任露國總統Vladimir Putin，kan-na 11%信任Trump。露西亞佇2014年併吞Crimea了後，西方發動經濟制裁，但是連Merkel本人，對制裁ê態度，前後mā無完全一致。

作者講，不管經濟抑是國防，德國猶是一定需要美國，毋過Merkel考慮著民意，mā袂當佮Trump行傷倚。另外，Trump對盟邦較無堅定，會加速德國重思考家己ê全球角色，這顛倒是一件好代誌。

頂日仔，Merkel接受國內報紙訪問，表示若有機會，伊贊成德國介入協調北朝鮮ê核武問題。《衛報》講，這反映出歐洲驚Trump共危機舞kah愈害。毋過這非常困難，畢竟過去ê談判攏失敗矣，北朝鮮宣稱伊ê核武計劃是無通參詳ê。總是Merkel ê國際承擔，koh行一大步。