【世界台】波蘭的民主倒退攄

波蘭的執政黨直直擴大權力，毋但將公共媒體改做政府單位，閣縮小憲法法庭的權能。遮的做法，使真濟人煩惱民主倒退攄，也可能已經違反歐洲聯盟的基本價值，予歐盟真頭疼。

法律和正義黨（PiS）有天主教的背景、提倡波蘭國族的復興、對歐盟較疏遠、排斥同性戀佮Muslim移民，同時主張大力掃除往過共產黨殘留的影響力。In佇舊年5月選贏總統，10月佇國會大選提著過半席次了後，動作才大起來。

PiS掌握的國會通過新的媒體法，共本來是公共媒體的電視台佮廣播電台，改做政府直接經營，由政府直接指派主管。

國會嘛修法改變憲法法庭的制度，提高做成判決所需要的出席佮同意的法官人數，本底只要有半數法官同意，這馬共改做愛三分之二，按呢憲法法庭就較歹挑戰法令的合憲性。另外，新國會閣換掉進前國會已經通過任命的五位法官。

執政黨遮的作為，毋但佇國內引起街頭抗議，嘛受著歐盟關切。歐盟佇2014年建立一種機制，來評量會員國敢有違反「法治」。正月13，歐盟已經決定針對波蘭，頭一擺來動用這个機制。上嚴重的後果，是波蘭佇歐盟的投票權會予人暫停，毋過這種機會無大，因為彼需要全體同意，歐洲各國嘛無希望關係舞甲傷緊張。

佇歐盟內底，Hungary早就已經行這種保守的政治路線，這馬加上波蘭，3月欲國會大選的Slovakia嘛有可能跟綴。外界一般共這種政治叫做「非自由主義的民主」（illiberal democracy），大概的意思是講in有民主選舉的制度，但是無充分保障人民、尤其是少數群體的權利。

毋過美國Princeton大學的政治學者Jan-Werner Mueller最近寫一篇文章講，這个名稱其實真予人誤解。伊講，限制言論佮集會的自由、限制媒體多元、毋保障少數，這本身就是反民主的。